An Iglesia Filipina Independiente (Ingles: Philippine Independent Church), inaapod man na Simbahan Aglipayano, sarong denominasyon Kristiyano na nag'aayog sa tradisyon Katoliko bilang ini sarong simbahan nasyonal sa Filipinas, alagad suway sa organisasyon kan Simbahan Katoliko Romano. Si Gregorio Aglipay an enot na Obispo Supremo kaini huli kaiyan naapod man ining Simbahan Aglipayano asin inaapod man na mga Aglipay an mga kaapil kan simbahan.
An paglitik kaini sa Simbahan Katoliko nabantolin kan mga enot na kaapil kan enot na pederasyon nin mga unyon nin mga trabahador sa nasyon, an Union Obrera Democratica Filipina kan taon 1902. Si Isabelo de los Reyes iyo an saro sa kagtolod nin paglitik asin pigsonson niya na an enot na pamayo kan litik na simbahan iyo si Aglipay.[1][2] Makuri an reaksyon kan Simbahan Katoliko, mala ta an Santo Papa pig'orden sa Arsobispo kan Manila na ekskomunikaron an mga nagpamayo sa paglitik.[3] Poon 1960 an simbahan aglipayano nakikisaro sa Simbahan Episkopal kan Estados Unidos asin man poon 1965 nakisaro man sa Lumang Unyon Katoliko kan Utrecht.
An presenteng Obispo Maximo iyo si Reverendo Ephraim Fajutagana D.D., na an opisinang sentral yaon sa National Cathedral of the Holy Child sa may Taft Avenue, Ermita, Manila.
© MMXXIII Rich X Search. We shall prevail. All rights reserved. Rich X Search